Erfðanefnd landbúnaðarinsFrétt
Senda fyrirspurn
Minnka letur
Stækka letur
In English

Tenglar

LANDSÁÆTLUN 2014-2018

ERFDALINDASETUR LBHÍ

 

STEFNUMÖRKUNARÁÆTLUN

ERFÐANEFNDAR 2009-2013

 

MÁLÞING ERFÐANEFNDAR OKT 2010

 

NordGen

 

GLOBALDIV

 

ELBARN

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

1.júní.2011

Íslenska landnámshænan - Kortlagning hænsnahalds og svipgerðarlýsing

 

Íslenska landnámshænan hefur að undanförnu átt auknum vinsældum að fagna hjá fjölmörgu áhugafólki um hænsnarækt. Þrátt fyrir einstaka sögu og aukinn áhuga á ræktun landnámshænunnar eru upplýsingar um útbreiðslu og einkenni stofnsins af skornum skammti. Skipulegar skráningar á útlitseinkennum og eiginleikum hænsnanna eru ekki til og ekki liggur fyrir hvað telja má upprunalegt varðandi eiginleika svo sem liti, egg og fjaðrir, en slíkar upplýsingar eru mikilvægur þáttur í ábyrgu ræktunarstarfi.

Í sumar er fyrirhugað að kortleggja dreifingu íslensku landnámshænunnar og annarra minni hænsnastofna á vegum Landbúnaðarháskóla Íslands og Erfðalindaseturs LbhÍ. Í kjölfarið verður safnað upplýsingum um svipgerðareinkenni íslenska stofnsins og þeirra erlendu stofna sem finnast hérlendis. Skráð verða útlitseinkenni hænsna, svo sem litur, kambgerð, fjaðrir á fótum, sem og stærð eggja, lögun og litur. Lögð verður áhersla á einkenni sem tengjast fiðruðum fótum en skiptar skoðanir eru meðal ræktenda landnámshænunnar um hvað telst upprunalegt í þeim efnum. Auk þess verður safnað upplýsingum um varp hjá íslenskum hænum, frjósemi í útungun og vanhöld á ungum.

Verkefni þetta er hluti af stærri rannsókn á stofni íslensku landnámshænunnar sem hófst árið 2009 og miðar að því að lýsa einkennum stofnsins og stuðla þannig að áframhaldandi varðveislu hans. Í fyrstu verður lögð áhersla á að safna upplýsingum um fjölda eigenda, fjölda hænsna á hverjum stað og hænsnakyn. Eftir að þær upplýsingar liggja fyrir verður haft samband við eigendur til að safna upplýsingum um svipgerðareiginleika. Hænsnaeigendur eru hvattir til að taka þátt, óháð fjölda hænsna og því hvaða hænsnakyn þeir halda. Áhugasamir vinsamlegast hafið samband við Birnu Kristínu Baldursdóttur sem halda mun utan um gagnasöfnun fyrir verkefnið (birna@lbhi.is eða í síma 433-5081).

Ásta Þorsteinsdóttir, nemandi við Landbúnaðarháskóla Íslands.

Birna Kristín Baldursdóttir, starfsmaður Erfðalindaseturs LbhÍ.

Emma Eyþórsdóttir og Jón Hallsteinn Hallsson, erfðafræðingar við Auðlindadeild LbhÍ.

Til baka Byggir á LiSA - Eskill, Sharepoint, Veflausnir og Vefumsjónarkerfi


Leit

Leitarvél